پاکستان میں دوغلی باتیں

گذشتہ ہفتے پاکستان میں سلسلہ وار بم دھماکے سرخیوں میں رہے اور اس ہفتہ ایل کے اڈوانی کے چرچے ہند و پاک کے اخبارات میں کچھ زیادہ ہی عروج پر ہیں جسکی وجہ سے انکی شخصیت میں دو گنا اضافہ ہوگیا ـ ہندوستانی اخبارات نے اپنے ایڈیٹوریل میں اڈوانی کی شخصیت پر زبردست ضرب لگائی جب انہوں نے پاکستانی میڈیا کو دوغلی باتیں بتائیں ـ اچھا ہوا مشرف نے اڈوانی کو پاکستان آنے کا دعوت نامہ دیا اور اڈوانی پاکستان پہنچ کر یکلخت بہکی بہکی باتیں کرنے لگے ـ اسوقت وی ایچ پی اور بی جے پی دونوں گروپ اڈوانی سے سخت ناراض ہیں اور مطالبہ کر رہے ہیں کہ اڈوانی اپنے الفاظ واپس لیں ساتھ ہی ہندوستان کے تمام ہندوؤں سے معافی مانگیں کیونکہ اڈوانی نے پاکستانی میڈیا کے سامنے اعتراف کیا کہ بابری مسجد ڈھانا ایک بہت بڑی غلطی تھی ـ سچ تو یہ ہے انسان اِس عمر میں بہکی بہکی باتیں کرنے لگتا ہے ـ اگر اڈوانی ایک عام انسان ہوتے تو کچھ اور بات تھی مگر وہ تو ٹھہرے سیاستدان اور سیاستدان کا کیا اعتبار! انکی شخصیت اور زبان کچھ ایسی ہی ہے کہ الٹا پلٹا کچھ بھی کہہ دے سننے والے کو چاہئے کہ درگذر کردے یہ نہیں کہ اخبارات عوام میں ایک نیا موضوع چھیڑ دیں ـ