یہ خدا ہے ـ 37

حضرت Paul مجلس میں کسی نے باادب پوچھ لیا: مرنے کے بعد کیا ہوگا؟ خدا کی بجائے امریکہ نے جواب دیا: عراقی گلیوں میں سڑی گلی لاشیں ہر دن ٹیلیویژن پر دکھائی دیتی ہیں، مرنے کے بعد انسان سڑ گل جاتا ہے اور کچھ نہیں ـ اسی کے ساتھ مجلس میں موت پر مذاکرات شروع ہوئے، مرنے کے بعد کیا واقع انسان کی روحیں بلاک ہول چلی جاتی ہیں؟ اگر ایسا ہے تو جنّت اور جہنّم کی عمارتیں شاید وہیں ہونگی ـ چاند اور مریخ تک ہاتھ لمبے کرلینے کے بعد اب جاپان، چین، امریکہ وغیرہ بلاک ہول سے آگے جھانکنے کی تاک میں ہیں ـ خدا کچھ اور خیالوں میں گُم ہے اور مجلس میں باقی لوگ موت پر بحث کر رہے ہیں، اچھا ہوتا اگر سب کو ایک ساتھ موت آئے مگر شاید یہ ممکن نہیں کہ بلاک ہول میں ایکساتھ داخل ہوں ـ حالانکہ سونامی کے موقع پر لاکھوں لوگ خدا کا لُقمہ بنے تھے، ممکن ہے قطار باندھے بلاک ہول سے داخل ہوئے ہوں ـ خدا کے منہ پر پانی مارا، یہاں سب لوگ موت پر بحث کر رہے ہیں اور وہ تخت پر بیٹھا اُونگھ رہا ہے ـ تھوڑا ہوش آیا تو یوں لگا جیسے بارش شروع ہوگئی، امریکہ نے بتایا: یہ بارش نہیں بلکہ خوفناک برفباری جو کیتھرینا، ریٹا اور وِلما جیسی خوبصورت بلاؤں سے بڑی ظالم ہے اور اِن آوارہ حسیناؤں پر عاشق ہونے کیلئے حضرتِ پال بیقرار مچل رہے ہیں ـ اِس گرما گرم بحث پر خدا کے کان کھڑے ہوگئے، وہ کچھ بولنے کا موقع تلاش کر رہا تھا حالانکہ ابھی بھی اُسکی آنکھوں پر نیند سوار ہے ـ پچھلے چار گھنٹوں سے ’’موت اور اُسکے بعد‘‘ موضوع پر مذاکرہ جاری ہے ـ ـ ـ باقی پھر کبھی

یہ خدا ہے ـ 36

عید کا چاند؟ خدا کی بارگاہ میں امریکہ نے چین پر مقدمہ ٹھونکا، خفیہ طور سے چاند پر فلیٹوں کی مارکیٹنگ شروع کردی ہے، وہ دن دور نہیں جب پورے چاند پر چین اپنا قبضہ جمالے ـ پھر پتہ نہیں اُن لوگوں پر کیا گُذرے گی جو چاند سے عقیدت رکھتے ہیں، عربیوں کو بھی اپنا کیلنڈر عیسوی سے جوڑنا پڑے گا پھر عید کیلئے چاند دھونڈنے کی بجائے امریکہ سے پوچھنا پڑے گا ـ ضروری ہے چاند کو اپنی حالت پر چھوڑ دے ورنہ کئی لوگوں کو افطار کیلئے اندھیرا ہونے تک بھوکا رہنا پڑے گا ـ اِس مقدمے پر خدا غور ہی فرما رہا تھا، اچانک روس نے خدا کے کان میں سُر پھونکی: سچّی بات تو یہ ہے امریکہ اُن ممالک سے بہت جلتا جو چاند پر جاچکے ہیں، دراصل امریکہ کبھی چاند پر گیا ہی نہیں اُوپر سے جھوٹے دعوے کرتا ہیکہ سب سے پہلے چاند کی تسخیر اُسی سے ہوئی ـ صف میں کھڑے مشرف نے بھی اپنا سوال اُٹھایا: ہمارے ملک میں ہمیشہ سے عید کا چاند ایک مسئلہ بنا ہوا ہے، آدھی قوم کو چاند دکھائی دیتا ہے تو باقیوں کو دوسرے دن نظر آتا ہے اور یہ سلسلہ زمانہ دراز سے ہمارے بیچ انتشار بنا ہوا ہے ـ جاپان نے رائے دیا: اچھا ہے ہر ایک ملک کا اپنا چاند ہو، اور ہمارے لئے چاند بنانا کوئی مشکل کام نہیں ـ اِس پر سعودی شاہ نے آمین کہا: سب سے پہلے ہم اُسے خریدیں گے ـ اتنا سب سُننے کے بعد امریکہ نے بانگ دیا: جب خدا خود ہمارے ساتھ ہے تو چاند کی کیا ضرورت؟ اور خبردار، اگر کوئی خدا کے چاند کو چھیڑے تو امریکہ اُس پر عذاب بن کر اُترے گا ـ امریکہ نے دانت دکھاتے کہا: ہم نے خدا کو تک نہیں بخشا، ہماری قید میں ایسے پھنسا کہ وہ توبہ کرنا بھول گیا ـ ہماری روشن خیالی کی قسم، اگر کوئی چاند پر قبضہ جمانے کی کوشش کرے تو چاند کو ہمیشہ کیلئے غائب کردیں گے اور پھر ساری دنیا ہم سے پوچھ کر سوئے گی کہ رات ہوگئی!!! ـ ـ جاری باقی پھر کبھی اس تحریر پر ہندی زبان میں تبصرے

نئی مطبوعات کا اجراء

قومی کونسل برائے فروغ اُردو زبان کے چیئرمین اور فروغ انسانی وسائل کے مرکزی وزیر ارجن سنگھ نے قومی اردو کونسل کی تین اہم مطبوعات ’’اے کورس ان اردو پروننسیئشن‘‘، اردو اچّارن (مرتب: ڈاکٹر روپ کرشن بھٹ، سابق پرنسپل پبلیکیشن آفیسر، قومی اردو کونسل)، ’’کلیات سعادت حسن منٹو‘‘ جلد اول (مرتب: پروفیسر شمس الحق عثمانی اور ’’کلیات سردار علی جعفری، جلد اول و دوم (مرتب: پروفیسر علی احمد فاطمی) کا اجرا کونسل کی 23 ویں ایگزیکیٹو بورڈ کی میٹنگ کے موقع پر شاستری بھون میں کیا ـ ان کتابوں کی اہمیت و افادیت پر روشنی ڈالتے ہوئے قومی اردو کونسل کے وائس چیرمین شمس الرحمن فاروقی نے کہا کہ اردو پروننسیئشن ورکشاپ موڈ میں کونسل کے ذریعے انگریزی اور ہندی میں مع CD اِن لوگوں کیلئے تیار کرائی گئی ہے جو اردو سے تو واقف ہیں لیکن الفاظ کے تلفظ کی صحیح ادائیگی پر قادر نہیں ـ انہوں نے امید ظاہر کی کہ اردو سے شوق رکھنے والے ان کتابوں اور CD's کے توسط سے اردو الفاظ کی صحیح ادائیگی پر بھی دسترس حاصل کریں گے ـ سعادت حسن منٹو کی پچاسویں برسی پر خراج عقیدت پیش کرنے کیلئے ان کے تمام تحریروں کو شائع کرنے کا کونسل نے منصوبہ بنایا ہے اور یہ اس کی پہلی کڑی ہے ـ علی سردار جعفری ترقی پسند تحریک کے صف اول کے شاعر ہیں، ان کی تمام نثری اور شعری تحریروں کو جمع کرنے نیز کلیات کی شکل میں شائع کرنے کا منصوبہ بھی کونسل نے بنایا ہے جس کے تحت اب تک دو جلدیں شائع ہو کر منظر عام پر آچکی ہیں ـ اس کے بعد کونسل کے ایجنڈے پر بھرپور گفتگو ہوئی اور اردو کی ترقی اور بقاء کے لئے قومی اردو کونسل نے جو مختلف تجاویز بورڈ کے سامنے غور و خوض کیلئے رکھی تھیں، ان کو منظور کیا گیا ـ ان میں ملک کے طول و عرض میں اردو مراکز کا قیام، کتابوں کی نمائش و فروغ کیلئے بیرون ملک میں اردو کے ثقافتی مرکزوں میں کونسل کی شمولیت نیز اردو ثقافتی سنٹر قائم کرنے کی تجویزوں پر بھی غور کیا گیا ـ آخر میں فروغِ انسانی وسائل کے مرکزی وزیر ارجن سنگھ نے اُردو کی ترقی کیلئے ہر ممکن مدد کا تیقن دیا ـ شکریہ: روز نامہ اعتماد حیدرآباد (نیوز: یو این آئی)

"رنگ دے بسنتی" سڈنی میں ایوارڈ

راکیش مہرہ کی فلم ’’رنگ دے بسنتی‘‘ کو آسکرس کے بہترین غیر ملکی فلم کی کیٹگری میں ہندوستانی انٹری کیلئے چننے کے بعد، دیگر سات آسکر زمروں کیلئے بھی بھیجا گیا ہے اور اس بیچ سڈنی کے ہندوستانی فلم میلہ میں اسے بہترین فلم کے ایوارڈ سے نوازا گیا ـ فیصلہ سنانے والی جیوری ٹیم صرف آسٹریلیائی ماہرین پر مشتمل تھی ـ یہاں چوتھے ہندوستانی فلم میلہ میں کئی دوسری فلمیں بھی مقابلہ کیلئے آئی تھیں وشال بھاردواج کی ’’اُوم کارا‘‘، راج کمار ہیرانی کی ’’لگے رہو منّا بھائی‘‘، روہن سپی کی ’’بلف ماسٹر‘‘، اپوروالاکھیا کی ’’ایک اجنبی‘‘، پریہ درشن کی ’’چھپ چھپ کے‘‘ کرن جوہر کی ’’کبھی الوداع نہ کہنا‘‘ اور جنیفر بروا کی ’’میں نے گاندھی کو نہیں مارا‘‘ وغیرہ شامل تھیں ـ

اِن سے ملو ـ 35

یہ خدا ہے پتہ نہیں کیوں، آج شام کی چائے کے بعد خدا کو پان کھانے کی سُوجھی اور ویسے بھی امریکہ میں قانونی طور پر پان ممنوع ہے ـ خدا نے اپنی قدرت کا کرشمہ دکھانا چاہا اچانک مشرف نے آگے بڑھ کر خدا کی خدمت میں پان مسالے دار پیش کیا ـ پان چباتے خدا نے افضل گوورو کے مقدمے پر اپنا فیصلہ سُنایا: اگر افضل کو پھانسی پر لٹکا دیا تو کئی افضلوں کو دہشت پھیلانے کا موقع ملے گا اور اگر اُسے پھانسی سے بچالیا تو پھر آگے چل کر وہ دیش کا سیاستدان بنے گا ـ وہیں افضل کی بیگم خدا سے التجا کر بیٹھی: کاش خدا افضل کی جگہ لے لے، اور ویسے بھی خدا کو موت نہیں آتی ـ اگر واقع میرے افضل کو پھانسی پر لٹکا دیا تو دنیا میں مَیں اکیلی اپنے بچے کیساتھ اور افضل وہاں جنّت میں حوروں کیساتھ جو مجھے برداشت نہیں ـ خدا نے اپنا فیصلہ جاری رکھا: سبھی انسانوں کی موت اور زندگی خدا کے ہاتھ میں ہے مگر دہشت گردوں کی موت خود انسانوں کے ہاتھ میں ہے ـ مانا کہ ہم نے مجاہدین کیلئے جنّت کا وعدہ کیا تھا، مگر وہ بیچارے اپنے کرموں کا پھل یہیں دنیا میں بھگت رہے ہیں ـ کسی بھی زندہ انسان کو پھانسی پر لٹکانا بُری بات ہے مگر دہشت گردوں کو دیکھتے ہی گولی مار دیتے تو آج افضل کو لٹکانے یا نہ لٹکانے کا سوال ہی نہیں اُٹھتا ـ قریب کھڑے مشرف پر پچکاری مارتے ہوئے خدا نے بات جاری رکھی: آج چھوٹے ممالک بھی اپنی طاقت آزمانا چاہتے ہیں، شمالی کوریا پر ہماری لعنت ہے جو امریکہ کو تنگ کرنے پر تُلا ہے ـ اگر آج کے بعد کسی نےایٹمی دھماکہ کی کوشش کرے، خدا امریکہ کے ساتھ ہے اور خبردار اگر امریکہ کو کسی نے تنگ کیا تو اُس کیلئے خدا حافظ ـ افغان اور عراق کو سُدھارتے ہم کنگال ہوچکے پھر لبنان میں حزب اللہ کو للکار کر اپنی ٹانگ تڑوالی اب سمجھ میں نہیں آتا اپنا لنگڑا ناچ ایران میں دکھائے یا شمالی کوریا پر؟ خدا نے پان چباتے ایک اور پچکاری مشرف پر مارا اور فرمایا: خدا کو خدا کی قسم! ہم دلگی ہی دلگی میں مشرف کو نچاتے رہے اب تو وہ ناچتے ہوئے ڈسکو بھانگڑا پر کمال پاگئے ـ جنوبی ہند کے منگلور شہر میں حالیہ مذہبی فساد پر خدا نے افسوس ظاہر کرتے ہوئے کہا: اچھا ہے ہم بھارت میں نہیں بلکہ امریکہ میں ہیں، اگر بھارت میں ہوتے تو وہاں کے جنونی مذہب پرست ہمیں عقیدت سے چبا ڈالتے ـ یہیں قریب کھڑے بھارتی سفیر نے خدا کو یاد دلایا: آپ کو بھارت میں ہونا ضروری نہیں، وہاں پہلے سے ہی کئی اقسام کے خدا موجود ہیں اور ہر دن ایکدوسرے کے خداؤں کو چباتے رہنا ہمارے کلچر کا ایک حصّہ ہے ـ ڈنمارک میں پھر ایک بار گستاخانہ فعل پر خدا نے توبہ کرلی: شُکر ہے ہمارا کوئی مذہب نہیں، اگر چاہیں تو خدا پر کارٹونس بنائے اور ثواب حاصل کرے ورنہ سب ایکدوسرے کے خلاف کارٹون بنالیں ساتھ میں "عالمی خون خرابہ" کی تیاری بھی کرلیں ـ بائیں جانب کھڑے افغانی صدر حامد کرزئی کو دیکھ کر خدا نے مسکراتے ہوئے کہا: پان کھانے کے بعد اب ناچ دیکھنے کو جی چاہتا ہے، مشرف اور کرزئی دونوں صدور سے عاجزانہ التماس ہے کہ آپ دونوں ایک ساتھ جم کر ناچے اور خدا کو خوش کرے ـ ـ جاری باقی پھر کبھی اس تحریر پر ہندی زبان میں تبصرے

بھارتی شاعر پولینڈ میں

اُردو شاعری نے اب پولینڈ تک رسائی حاصل کرلی ہے جہاں بیسویں صدی کے شعراء فیض احمد فیض اور جانثار اختر کی غزلیات کا پولِش زبان میں ترجمہ کیا گیا ہے ـ جانوس کرزوسکی اور سریندر زاہد نے جو ہندوستانی شاعر ہیں، اُردو شعراء کی شخصیات پر کتاب شائع کی ہے جس میں فراق گورکھپوری، قتیل شفائی، ابن انشاء، پروین شاکر، بشیر بدر اور ندا فاضلی کی غزلیات بھی شامل ہیں ـ کرزی زوسکی اور سریندر زاہد نے قبل ازیں میر تقی میر اور مرزا غالب کے کلام کا بھی ترجمہ کیا ہے ـ پولینڈ میں ہندوستانی سفیر انیل ودودا نے اس ہفتہ اپنی رہائش گاہ پر منعقدہ تقریب میں کتاب کا رسم اجراء انجام دیا ـ اِس تقریب میں 100 سے زائد پولِش شعراء، ادباء، نقاد، صحافی اور دانشوروں کے علاوہ سفارتکار بھی موجود تھے ، مسٹر ودودا نے بتایا کہ دو سال سے کم عرصہ میں ان دو مترجمین نے اُردو شاعری کی 4 کتابیں پیش کی ہیں ـ انہوں نے کہا کہ ہندوستان کی اِس شیریں زباں کی نغمہ ریزی کو فروع دیتے ہوئے ایک عظیم کارنامہ انجام دیا ہے ـ بشکریہ روز نامہ اعتماد حیدرآباد